كرة محلية

سليمان عبدربة : الموسم الحالي إستثنائي لطنطا وقادرين علي البقاء

منار محمد

خطفوا الأنظار إليهم منذ الجولة الأولى من منافسات الدوري الممتاز، حيث أشاد الجميع بقدرات الفريق الطنطاوي الدفاعية التى قاضتهم لحصد أول ثلاث نقاط من غمار المنافسة .

فيقال في عرف كرة القدم إذا امتلكت خط دفاع قوي فهذا خير سبيل للهجوم ، وهذا ماقدمه أبناء السيد البدوي خلال مباريات الدوري الممتاز بالموسم الحالي .

ويحاور موقع الاستاد دوت كوم الاعب سليمان عبدربة أحد نجوم خط دفاع الفريق الطنطاوي، ليجيب عن كواليس المشاركة في الممتاز وطموحه خلال الفترة المقبلة.

تألقتوا في أول مباراة بالدوري أمام دجلة وخصوصا في الشق الدفاعي ؟

بالطبع البدايات بتكون صعبه برغم ان فريق الخصم منظم في كل خطوطه واسلوب لعب معين بيلعب بيه منذ موسمين ، الحمد لله كابتن ايمن درس فريق دجله كويس وطبعا الطريقه الدفاعيه دي اسلوب لعب وطريقة لعب زي ما الطريقه الهجوميه اسلوب لعب اشتغلنا في التدريبات ازاي نقفل علي نقط القوه بتاعتهم ونستغل الهجمه المرتده وربنا كرمنا بواحده خلصنا بيها الماتش وده اللي كنا محتاجينه في البدايه مكسب .

ما هي تعليمات الكابتن أيمن المزين بالتحديد قبل المباراة ؟

أعطي تعليمات بغلق الخطوط تماما ويتم اللعب في مساحة من 35 : 40 متر ، مهما تنقل فريق دجلة للكرة، وأكد علي عدم اندفاع اللاعبين ونحافظ علي المسافات بين الخطوط بجانب التمركز الصحيح .

ما هي الأهداف التي تسعوا اليها في الموسم الحالي ؟


الكابتن أيمن بيتكلم معانا ان شاء الله الموسم ده يكون موسم استثنائي لينا لان احنا معانا قوام فريق كله خبرات وكله لعب دوري ممتاز مع التدعيمات اللي جبناها قدر يعمل توليفه كويسه كلها تقدر تعمل حاجه تليق باسم نادي طنطا ونكون في مركز كويس في الجدول

برأيك من هو الفرق الذي تخشوه خلال الموسم الحالي !


دلوقتي بصراحه مفيش فريق سهل الدوري كله صعب واللي عايز يعمل حاجه لنفسه ولاسمه ميبصش هو بيلاعب مين .

شايف إزاي فرص طنطا في البقاء وما هي الفرق التي تتوقع وجودها في صراع الهبوط ؟


انا شايف كتير بصراحة اندية الحرس ، اف سي مصر ، اسوان ، انبي ، الجونه ، الانتاج ، ووادي دجله ، ولكن الموسم الحالي موسم صعب جدا وممكن يحصل مفاجأه وتتفاجئي بفريق كبير بيهبط .

من وجهة نظرك مين الفريق الذي يستطيع حسم المنافسه؟


البطولة صعبة وكل المباريات قوية ولا يوجد فرق بين نادٍ كبير وآخر صغير، المستويات متقاربة بشدة وهو ما يزيد من حجم المنافسة ويصب في مصلحة الكرة المصرية في نهاية الأمر، وفي النهايةكل الاحتمالات واردة في أي مباراة، ولكن مع احترامي لجميع فرق الدوري الاهلي قادر يحسم البطوله من البداية

ما هي التوجيهات الاساسية من الكابتن/ أيمن المزين في المباريات وتعامله معكم ؟

كابتن ايمن دايما ما يتحدث معانا باننا فرقه كبيره وفرقه محترمه ولاعيبه اسماءها كبيره مينفعش ننزل اي ماتش نلعب علي بنط لو لعبنا علي بنط هننزل نخسر احنا بنزل نلعب مع اي فريق ع ال ٣ بنط وفنفس الوقت دايما اللاعيبه كلها مركزه لاخر دقيقه ف الماتش ومنستعجلش المكسب، المكسب بيجي في اي وقت اهم حاجه نفضل مركزين اننا ميجيش فينا هدف ولقدر الله لو دخل فينا هدف منيياسش ونلعب لاخر دقيقه والحمد لله احنا ماشيين بالتعليمات دي ومن ناحية المعامله بصراحه الكابتن ايمن بيعاملنا كلنا كاننا اخواته الصغيريين وبيعامل اللاعيبه اللي بتخرج بره الاسكور احسن من اللي بيلعبوا اساسي علطول بيتكلم معانا كاخ كبير لينا وانتوا رجاله وليه متبقوش في المنتخب وتعملوا اسم كبير ليكوا وتاريخ كبير بلدك تتشرف بيك واهلك يتشرفوا بيك لا بصراحه الراجل ده من المدربين المحترمين اوي وربنا يكرمنا ويوفقه باذن الله

طموحك كلاعب وطموحك مع فريقك ؟


طموحي كلاعب ان امثل منتخب مصر ف كاس العالم وطموحي مع طنطا اننا نعمل موسم استثنائي ونعمل مركز كويس في جدول المسابقه ونعمل حاجه كويسه تليق باسم نادينا

وجه كلمه لجمهور طنطا ؟


جمهور طنطا ده انا مهما اتكلم مش هديله حقه الناس المحترمه اللي بتسيب اكل عيشها وبيوتها علشانا حتي واحنا خسرانين بتلاقيهم اول ناس واقفين وبيشجعونا ويحفذوناً بوعدهم طبعا اننا كلنا هنتعب وهنحارب علشان نخليهم مبوسطين وبقولهم خليكوا ورانا لان انتوا مصدر الثقه بتاعنا وطول ما انتوا ورانا احنا مطمنين

عايز اشكر كل اللاعيبه الرجاله اللي معانا كلهم لاعيبه محترمه بجد مشوفتش احترام دي ده قبل كده واشكر الجهاز الفني المحترم اوي وبشكر طبعا كابتن علاء عكاشه مدير الكره اللي بيتعب علشانا بصراحه والجهاز الطبي اللي تعبان معايا زي ما بيتعب مع كلً اللاعيبه المصابه والجهاز الاداري والعمال وطبعا بشكر جمهورنا العظيمً جمهور طنطا اللي دايما معانا ف الخساره قبل المكسب

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى