عم حارث … تاريخ من الحب والعطاء للنادى الأهلى !

عم حارث .. الراجل الطيب

كتب / عزت رمضان

ومين قال ان كلامنا بس عن عظماء الملعب وعظماء الإدارة ؟

احنا كلامنا عن عظماء” القيمة” وعظماء” التأثير ” وعظماء قدرة الوصول لقلوب الناس .

بكلمك عن صاحب ال ٧٦ بطولة و٤٦ سنة اهلي و اللي عاصر ٦ رؤساء

لو انت صحفي مش هتعرف تاخد منه ولا كلمة حتى لو عرضت عليه فلوس كتير يخاف تكون عايز تسرسبه وده ضد مصلحة الفرقة

يكفي اقولك انه طلب مني اكلم سيد عبد الحفيظ استاذنه عشان يقدر يتكلم معايا بارتياح… جميل الراجل ده

يرد عم حارث بيقوللي : انت فاكر ان علاقتي بالاهلي علاقة شغل ؟ ده انا ياما عيني دمعت بسبب الاهلي . دمعت من الحزن ودمعت من الفرحة ودمعت من الفراق

دمعت وقت خسرنا نهائي الكاس ٢٠١٥ قدام الزمالك
دمعت وقت خسرنا نهائي افريقيا ٢٠٠٧ قدام النجم
دمعت وقت خسرنا نهائي افريقيا ٢٠١٨ قدام الترجي

بس فرحت اوي لما كسبنا كاس مصر ٧٨ لا فرحت بصحيح . ماهو ماينفعش كنا نخرج م الموسم ده من غير بطولة . الجيل ده اصلا من اقرب الاجيال لقلبي بحبه اوي والله

لكن بالعودة لدموع عيونه وحكاية دموع الفرحة ودموع الفراق

بيقولي : دمعت بعد افريقيا ٢٠٠٦ وجون ابو تريكة , ياااه ع الاحساس والفرحة

بس اصعب دموع كانت دموع فراق عبد الوهاب الله يرحمه كان يوم مايعلم بيه الا ربنا

اصعب موقف كان اعتزال ابو تريكة بقيت بقول ايه ده هو انا مش هرجع اشوف تريكة كل يوم تاني

ولقيت نفسي بعيط . اصلك ماتعرفش ابوتريكة كان بيعمل ايه. انا لحم كتافي من خير الاهلي وخير ابو تريكة

اكبر الصحفيين كانوا بيدوخوا على رقمه بس الغلابة لو عدوا بس من قدام بوابة النادي ومن غير مايسألوا بيلاقوا معاهم رقم تريكة ..هو موصي الناس ع البوابة بكده

وبيكمل : شوف انا عدى عليا كام دوري بس الدوري الاخير ده بقى اغلى دوري في حياتي ..

ايه ده كل دول ع الاهلي ؟
كل دول عايزينوا يخسر ؟ بس في الاخر برضه كسب هو ده الاهلي ( ويضحك ضحكة جميلة)

بقوله : امتى فقدت الامل في الدوري وامتى حسيت انه خلاص بقى بتاعنا ؟

عم حارث : لما خسرنا م المقاولين الدنيا كانت سودا بس
اول م الزمالك اتعادل مع الانتاج وماتش تاني , قولت خلاااااص الدوري ده بتاعنا باذن الله.

ماكنتش عارف ابطل كلام معاه حاسس اني بكلم حتة من الاهلي

نجوم كتير لعبوا وكسبوا شهرة ومكانة وفلوس بس ماطمرش فيهم

الراجل ده البسيط ده هو الشخص ( الملهم ) اللي بيقولك ان مش مهم تكون شغال احسن شغلانة وبتقبض اكتر فلوس عشان الناس تشعر بوجودك واهميتك وتأثيرك

بالعكس شغلانة بسيطة زي عامل غرفة ملابس تقدر منها تصنع محبة وتأثير و حب الناس يطاردك في كل مكان

.و الدنيا تتقلب لما تطلع اشاعة عليك انك مريض .. انت والله نجحت

وشوفه هو وشوف القيمة اللي اضافها للمكان حتى وهو مكان بسيط .. والله تشرفت بالكلام معاك وعنك ❤

“عم حارث ” .. ياراجل ياطيب .

الف سلامه عليك يا بطل