يا يا يا تريكه كل سنه وانت طيب يا حبيب الملايين
كتب / عزت رمضان
بيقولوا علينا بنحبه عشان لعيب رائع ! طيب ده احنا عندنا الف لاعب رائع بس احنا الاهلاوية بنعرف نختار رموزنا .
صعب تلاقي انسان بيجمع كل ده من الصفات الجميلة . عايز اتكلم عن الانسان اللي مايقلش قيمة عن اللاعب
اوعوا تفكروها صفات اكتسبها بعد انضمامه للاهلي ! وقت وجوده في الترسانة كان له مواقف كتير بس لانه شبه مغمور ماحدش عرفها وقتها
زميله في الترسانة احمد زغلول بيقول عنه :
” كنا بنجدد عقدنا سوا , المسؤولين في الترسانة عرضوا عليا مبلغ معين ماعجبنيش , زعلت جدا وتريكة شافني وانا زعلان , فجأة لقيت مسؤولي الترسانة بيزودوا المبلغ ! قولت ايه ده؟! بس عرفت بعدها ان تريكة قال للمسؤولين نزلوا من عقدي وزودوا عقد احمد زغلول وانا راضي وده اللي حصل فعلا ” .. هو في كده ؟
لكن واحد من المسؤولين كان الكابتن الكبير حسن الشاذلي بيقول عنه : كنا كل فترة نطلع سلفة للاعيبة كان تريكة يقولي شوف يا كابتن مين مزنوق وفك زنقته ومش مهم انا اخد .. زمايله كانوا بيموتوا فيه ويحترموه
لكن حسن فريد حكى قصة مختلفة :
بيقول لقيت الباب بيخبط الساعة ٧ الصبح فتحت لقيت تريكة ومعاه شنطة !
- ايه الشنطة دي يا محمد ؟
= دي شنطة فيها فلوس واخدها م الزمالك - وايه اللي مصحيك بدري كده ؟
= انا اصلا مانمتش انا كنت بايت في الجامع خايف على الشنطة احسن تتسرق مني واول ما الصبح طلع قولت اجيبهالك , انا عايز اروح الاهلي مش عايز اروح الزمالك .
ورجعت الشنطة وبيعته للاهلي
الشخص ده بيتهم بابشع اتهامات ..اتقال عنه خاين ! اتقال عنه بيكره بلده ! اتقال عنه ارهابي ! ارهابي ؟
بيقول عنه نجيب ساويرس احد ابرز مسيحيي مصر واشهرهم : ياريت لعيبة مصر كلها في اخلاق تريكة ..ياسلااام . ده انا مرة اديته مليون جنيه هدية رفض ياخدهم وقاللي حطهم في جمعية خيرية .. لكن بعد الحاح مني خدهم حطهم هو في الجمعية الخيرية ..واحد من افضل الشخصيات اللي قابلتها ف حياتي
لكن خاين بلده ده تم دعوته لمباراة ودية في الكويت بمناسبة افتتاح استاد , وتم صرف ٥٠ الف يورو لكل نجم شارك في المباراة , إلا هو رفض و قالهم : انا مصري عربي ازاي اخد فلوس نظير واجب عليا في مشاركة بلد عربي فرحتهم …على طول بين الشوطين طلب امير الكويت مصافحته وصافحه وشكره على موقفه الجميل اللي يخليك انت كمصري تشعر بعزة نفس ان مش كل حاجة تمنها فلوس ..رغم انه هنا بيتجمد رصيده ويتحجز على فلوسه . بس هو هو الفتى العامل في مصنع الطوب اللي بيساعد والده وبيربطله حاجاته ع العجلة , نفس الرضا والقناعة , نفس عزة النفس
بيقول : كتت راجع من كاس العالم للاندية وجايلي عرض من الهلال السعودي بفلوس كتييير وكله موافق . بس لما رجعت لقيت الجمهور بيستقبلنا بحرارة رغم اننا راجعين خسرنانين, ايه الروعة دي وايه الجمهور ده ؟ طب اقعد ولا امشي , روحت سالت ابويا :
- جايلي عرض م السعودية يابا ومش عارف اعمل ايه
= انت عايز تعمل ايه ؟ - عايز اقعد بس العقد بملايين
= واحنا يابني بتوع ملاييين
شوفت انت علمته ايه ياحاج ؟ الله عليك
قالوا عنه حبيب البسطاء ..
بيقول عنه عم حارث ان دموعه نزلت يوم اعتزاله , كل بسيط بيقدر يوصله , وبيقدر هو يوصل لكل محتاج
شعبيته في الكويت والجزائر وتونس والمغرب ,شعبيته في كل بلد عربي تقدر تقول ان العرب اختلفوا في كل حاجة واتفقوا على حب تريكة
يمكن اصعب موقف في حياتك لما تفقد والدك او والدتك . تخيل بقى تفقده وتقف بعيد( محروم ) انك تودعه ! محروم انك تبوسه اخر بوسة على جبينه ! محروم انك تقوله مع السلامة يابا !!
مش بس كده ده انت كمان عاجز انك تاخد عزاه وعاجز انك تاخد امك في حضنك وتقولها حسك بالدنيا وتحسسها ان الدنيا لسه مافضيتش وانك عكازها اللي هتتعكز عليه
بس والدته شافت حاجة مختلفة ..شافت الرويبضة بيشتموه باقذر الالفاظ وبيصفوه بابشع الصفات وبيتهموه باسوأ التهم و بتتصادر فلوسه وبيتحط في خانة الارهابيين ..ارهابيين !! وهو ساكت ومحتسب
ايه يانجم ياكبير مش هانت بقى ولا ايه ؟
ممكن نرجع نشوفك في وسطنا ؟
ممكن حقك يرجع وترجع بلدك معزز مكرم ؟
مش متاكدين . بس متاكدين ان ربنا كبير وفوق الكل
مش بفتكره وبكتب عنه عشان عيد ميلاده النهارده لكن بفتكره كل مابشوف مظلوم على وشه ابتسامة مدارية الم وحزن كبير .. ربنا معاك ياتريكة
وكل سنة وانت طيب
