تقارير وحوارات

لاعب المقاولون يتحدث للإستاد عن الظلم الذي تعرض له


كتبت _ ريماس أسامة

تحدث لاعب مقاولون طنطا أحمد شعبان للاستاد.كوم عن الظلم الذي تعرض له في مسيرته الكروية منذ بدايته في نادي سبورتنج كاسل وحتى نادي طنطا.

قائلا : ‏”انا بدات في سبورتنج كاسل في طنطا لعبت سنه ناشئين مع 97 وبعدين اتصعدت فريق اول مع الكابتن معروف عثمان كان عندي وقتها 13 سنه وكنت بلعب اساسي كنا درجه رابعه وقتها”.

واستكمل اللاعب حديثه : “روحت اختبارات في الزمالك وربنا كرمني وخدوني من اول اختبار ونزلت مع فرقه ال 97 كان الكابتن مجدي شلبي هو الي ماسك الفرقه ومضيت على الاستمارة وكل حاجه بس وقتها سبورتنج مردتش تمشيني غير ب60 الف وطبعا الزمالك مش هيشتري ناشئ من درجه رابعه”.

وتحدث اللاعب عن كيفية خرجه من اسبورتنج قائلا : “بعد ما سبورتنج رفضت تمشيني بشهر الكابتن معروف كلمني قالي هنروح كوكاكولا ممتاز ب في القاهره كانو هما خلصوني من سبورتنج ومكنتش اعرف السعر كام او اَي الي حصل وقتها دورت ان امشي من هناك وخلاص”.

ومن ثم تحدث اللاعب عن فترة لعبة بين سبورتنج ومقاولون طنطا : “لعبت سنه في القاهره وكنت مكسر الدنيا كان الكابتن نبيل ابراهيم هو اللى ماسكنا وكانت من احلي المواسم الي لعبتها في حياتي فضلت في كوكاكولا سنتين وبعدين روحت الاتحاد السكندري الدنيا مكنتش كويسه معايا خالص هناك واتصابت كتير وقتها ومشيت في شهر 1”.

وتحدث اللاعب عن مشواره مع نادي طنطا قائلا : “جيت في طنطا لعبت سنه ونص وكان اسوء فتره ليا اتظلمت كتير اوي في طنطا، في الناشئين 97 كنت بروح ساعات ايام الشتا مكنتش بلاقي حد في التمرين والكابتن محمد شبل كان بيمرني لوحدي واروح واجي وفي الماتش ألاقي نفسي على الدكه وبعدها جالي قطع في العضله الاماميه في ماتش شباب المحله قعدت بعدها 4 شهور “.

واستكمل اللاعب حديثه: “رجعت في القطاعات وكان اول ماتش ليا في كفر الشيخ لعبت باك رايت يومها عملت ماتش حلو جدا وبعدها وجبت جون وصنعت جونين في 4 مباريات والدوري خلص وقعدت في البيت مستني مكالمه عشان اتمرن مع الدرجه الأولي في طنطا بس طبعا كالعاده بيقدموا للفرقه بتاعت الناشئين تمرنتين ويقولو شكرا”.

واستكمل اللاعب حديثه : “جالي كذه عرض بعدها في مجموعه البحيرة وكذا فرقه في الدرجه الرابعة بس انا مستعجلتش بعدها ب اسبوع الكابتن محمد علوش كلمني روحت البيت عنده قعدت معاه اتكلم معايا ومضيت لمقاولين طنطا والحمدلله اتصابت في اول السنه بس رجعت في مباراة الزعفران اول ماتش لعبته جبت جون وكسبنا، وبعدها لعبت 7 مباريات كسبنا 5، واتعادلنا في ماتش 1 بنتيجة 2_2 وجبت في الماتش ده هدف، وخسرنا ماتش 1 “.

وختم لاعب مقاولون طنطا أحمد شعبان حديثه مع الاستاد.كوم قائلا : “أنا حاليا في عروض جيالي بس انا مستمر مع الكابتن علوش هو اكتر مدرب وقف جنبي احنا دلوقتي تاني مقرر في جدول المجموعة واحنا بنافس ع الصعود وان شاءالله يبقي من نصيبنا ونصعد بالفريق وبعد الصعود ممكن أفكر في العروض”.

الوسوم
زر الذهاب إلى الأعلى
إغلاق
إغلاق